Como unirse a Eirado

[INFORMACIÓN ACTUALIZADA - 04/10/2010]

Se tes vontade de formar parte de Eirado estás de sorte, porque é unha experiencia aberta a todo o mundo. Daquela, cal é o proceso para asociarse e participar?

O proceso

Consta basicamente das seguintes fases:

1. Enviar o formulario de solicitude de admisión por correo electrónico (eirado@eirado.org) ou por correo postal ao noso enderezo (dirixíndoo ao Consello Reitor da cooperativa Eirado): Avenida Quiroga Palacios 8, baixo. 15703 Santiago de Compostela.
   
2. Unha vez recibida a solicitude será o Consello Reitor da cooperativa quen a examine, dispondo dun prazo máximo de dous meses para decidir sobre dita solicitude.
3. Comúnicase por correo electrónico a aceptación ou negación (en caso de que non obteñas resposta en 2 meses enténdese esta por negativa).
4. En caso de admisión indicarase no mencionado correo os pasos a seguir entre os cales figuran os seguintes:

• Ingresar a achega ao capital social da cooperativa (100€) antes de 15 días.
• Ingresar na conta a parte proporcional da cota semestral (30€).
• Marcar unha reunión coa Comisión de benvida designada polo Consello Reitor ou a Asemblea, a cal explicará o funcionamento interno de Eirado e resolverá as dúbidas que poidan existir.

Desde aquí podes descargar un documento onde se explica máis polo miúdo o protocolo de admisión de nov@s soci@s. Por outro lado, recomendamos a lectura do Regulamento de Réxime Interno.

Lembra tamén que a admisión é para «unidades de consumo ou convivencia», é dicir, que se sondes varias as persoas na casa só tendes que presentar unha solicitude.

Preguntas frecuentes sobre o proceso de admisión.

Que é o capital social?

• É o capital que conforma a cooperativa e que serviría, en caso de quebra, de garantía para os nosos fornecedores.

Se me dou de baixa, devolvédesme a miña parte do capital social?

• Si. Ademais, se sondes varias as persoas convivindo só se precisa unha achega para todas.

Que implica ser socio/a de Eirado?

• Tal e como se pode ler no Regulamente de Réxime Interno, existe unha cota mínima de traballo. Eirado non dispón de traballadores/as asalariados e todo o funcionamento da cooperativa recae nas persoas asociadas. Esa cota de traballo implica realizar diferentes tarefas, que varían dependendo das preferencias e habilidades de cada un/ha, da dispoñibilidade e mesmo da situación persoal (pode solicitarse baixa por maternidade, doenza etc.).